Aeroporti i Mançesterit ka mbyllur përkohësisht të dy pistat e tij mëngjesin e sotëm për shkak të reshjeve të dendura të borës, me disa fluturime të devijuara drejt aeroportit të Birminghamit.
Përmes një postimi në ‘Twitter’, aeroporti këshilloi pasagjerët që të kontaktojnë linjën e tyre ajrore për përditësimin më të fundit në fluturimin e tyre.
“Pas mbylljes së përkohshme të pistave tona për shkak të borës, ne jemi të kënaqur të raportojmë se ato kanë rifilluar. Falënderojmë pasagjerët për durimin e tyre. Pasagjerët duhet të vazhdojnë të kontaktojnë linjën e tyre ajrore për informacionin më të përditësuar të fluturimit”, ka qenë postimi në rrjet.
Kujtojmë se një numër paralajmërimesh të rënda moti për borë dhe akull janë vendosur në të gjithë Mbretërinë e Bashkuar gjatë ditëve të fundit pas një rënie të temperaturave.
Parashikuesit presin që masa ajri më të ngrohta të fillojnë të lëvizin nga e premtja pasdite.
